Rusia është akuzuar për planifikimin e sulmeve terroriste kundër linjave ajrore ndërkombëtare në një valë globale sabotimi. Kryeministri polak Donald Tusk pretendoi se Rusia kreu atë që ai e përshkroi si "terror ajror" kundër linjave ajrore në Poloni dhe vende të tjera. Gjatë një konference për shtyp në Varshavë së bashku me presidentin ukrainas Volodymr Zelensky, Tusk tha: "Nuk do të hyj në detaje, mund të konfirmoj vetëm vlefshmërinë e frikës se Rusia po planifikonte akte të terrorit ajror, jo vetëm kundër Polonisë, por kundër linjave ajrore në mbarë botën. Këto akte sabotimi janë versione të luftës që Rusia i ka shpallur gjithë botës, jo vetëm Ukrainës”. Një mori fatkeqësish ajrore në Evropë kohët e fundit janë lidhur me Kremlinin nga shumë zyrtarë të inteligjencës perëndimore. Zyrtarët perëndimorë të sigurisë dyshojnë se inteligjenca ruse qëndron pas një komploti për vendosjen e pajisjeve shpërthyese në pako në avionët e ngarkesave të drejtuara për në Amerikën e Veriut. Kjo përfshin një që mori zjarr në një qendër postare në Gjermani dhe një tjetër që u dogj në një magazinë në Angli vitin e kaluar. Në nëntor, një avion mallrash i DHL nga Leipzigu, u përplas me një shtëpi vetëm 1 km e gjysmë përpara se të ulej në pistën e aeroportit të Vilniusit. Në incident humbi jetën një person. Pamjet tronditëse tregonin avionin në flakë ndërsa ekipet e emergjencave nxitonin të shuanin zjarrin. Në korrik, Rusia u bë sërish e dyshuara kryesore pas vendosjes së një bombe brenda një pakoje në një avion për në Britani. Pakoja mori flakë më vonë ndërsa ishte në një magazinë të DHL në Birmingham me zjarrin që u shua nga shërbimet lokale të zjarrfikësve. Këto incidente ringjallën frikën e operacioneve të fshehta sabotuese ruse kundër Perëndimit. Pak javë më parë Drejtori i Përgjithshëm i MI5 Ken McCallum paralajmëroi se Rusia ishte në një "mision të qëndrueshëm për të krijuar kaos" në rrugët e Mbretërisë së Bashkuar. Kremlini ka hedhur poshtë pretendimet e mëparshme perëndimore se Rusia sponsorizoi akte sabotazhi dhe sulmesh në Evropë. Në fund të vitit të kaluar, Azerbajxhani akuzoi Rusinë për rrëzimin e paqëllimshëm të një aeroplani azerbajxhanas në Kazakistan në ditën e Krishtlindjes, duke vrarë 38 persona.