Një operacion i madh kërkimi po zhvillohet në Gjermani për gjetjen e një apo më shumë sulmuesve të armatosur që vranë dy persona një ditë më parë, njoftoi policia. Trupat e dy viktimave, që të dy të vrarë me armë zjarri, u gjetën para një ndërtese banimi në Bad Nauheim, qytezë në veri të Frankfurtit, të shtunën pasdite, tha policia gjermane. “Një forcë e madhe policore është dislokuar”, ku përfshihen edhe policë pa uniforma, pjesëtarë të forcave speciale etj, të cilët po mbështeten nga helikopterë, për gjetjen e sulmuesit apo sulmuesve. “Bazuar në të dhënat e deritanishme, nuk ka rrezik për banorët apo për persona të tjerë”, tha policia gjermane. Sipas autoriteteve, ende nuk dihen “rrethanat apo motivi” i autorëve të vrasjeve ndërkohë që prokurorët dhe policia kanë nisur hetimet. Bad Nauheim gjendet 25 kilometra në veri të Frankfurtit dhe ka një popullsi prej afro 33.000 banorësh. Qyteti njihet në mbarë botën pasi aty Elvis Presley kishte kryer shërbimin ushtarak nga viti 1958 deri më 1960 dhe atje këngëtari u njoh me bashkëshoreten e tij, Priscilla Presley.