Tërmetet që goditën Turqinë më 6 shkurt dhe që lanë pas mbi 43 mijë të vdekur, qindra ende të zhdukur e mijëra pa çati mund të jetë shkaktuar nga dora e njeriut. Kështu të paktën hamendëson Presidenti i Agjencisë Hapësinore Turke, Serdar Hysein Jildirim. Për të, lëkundjet tektonike mund të jenë shkaktuar nga satelitë ushtarakë që lëshojnë nga hapësira shifra titani në tokë. Ka satelitë lufte, tha zyrtari turk, që mund të dërgojnë shufra titani 10 metra me saktësi në çdo objektiv! Sipas tij, këto shufra depërtojnë me shpejtësi ekstreme në një thellësi deri në 5 kilometra në tokë, duke krijuar tërmete me magnitudë 7 deri në 8 të shkallës Rihter. ‘Nuk është e mundur të gjurmohen”, tha ai. Shumë përdorues e ironizuan nëpër rrjetet sociale duke akuzuar Jildirim se kishte parë shumë filma fantastiko-shkencorë. Megjithatë, zyrtari turk u qëndroi deklaratave, por sqaroi se ato deklarata të bëra nuk lidheshin me rastin e tërmeteve në Turqi, pasi sipas tij, tërmetet kanë ndodhur në një zonë ku dihet se përplasen tre pllaka tektonike.