Venezuela po përballet me pasojat e një prej tërmeteve më të forta në historinë e saj moderne, pasi dy lëkundje me magnitudë 7.2 dhe 7.5 goditën vendin brenda më pak se një minute mbrëmjen e së mërkurës. Sipas presidentes në detyrë Delcy Rodríguez, deri tani janë konfirmuar të paktën 164 viktima dhe 971 të plagosur, ndërsa bilanci pritet të rëndohet pasi operacionet e kërkim-shpëtimit vazhdojnë. Shërbimi Gjeologjik i SHBA-së vlerëson se numri i viktimave mund të kalojë edhe 10 mijë persona. Presidenti amerikan Donald Trump dhe zyrtarë të tjerë kanë premtuar mbështetje për Venezuelën. Sekretari i Shtetit Marco Rubio njoftoi se ekipet amerikane të kërkim-shpëtimit po dërgohen në vend, ndërsa ndihmat do të transportohen nga Departamenti i Mbrojtjes për shkak të dëmtimeve në aeroportin kryesor të Karakasit. Megjithatë, detajet mbi shkallën e ndihmës amerikane ende nuk janë bërë publike. Ndërkohë, ish-presidenti Nicolas Maduro, i cili ndodhet në paraburgim në Nju Jork në pritje të gjykimit, bëri thirrje për “solidaritet maksimal” dhe mobilizim të menjëhershëm për t’u ardhur në ndihmë të prekurve nga katastrofa.