Dhjetëra të vdekur dhe qindra të zhdukur janë regjistruar pas përmbytjeve të menjëhershme që goditën kufirin mes Nepalit dhe Tibetit. Me qindra udhëtarë rezultojnë të zhdukur e mes tyre edhe të paktën 291 turistë të huaj. Të paktën 17 persona janë konfirmuar të vdekur ndërkohë që bilanci pritet të rritet sërish si pasojë e përmbytjes së menjëhershme dhe rrëshqitjes së dheut që shkatërroi disa fshatra dhe dëmtoi rrugët dhe infrastrukturën. Gjithcka ndodhi mëngjesin e të mërkurës, në veri të kryeqytetit të nepalit, Katmandu, me informacionet paraprake që sugjerojnë se tragjedia u shkaktua nga një tërmet, i cili nxiti një ortek me borë të shkrirë që u derdh në një lumë. Operacionet e kërkimit vazhdojnë në të dy anët e kufirit mes Tibetit dhe Nepalit dhe 12 persona janë shpëtuar deri më tani. Media shtetërore në Kinë, e cila kontrollon Tibetin, thotë se ka viktima të shumta dhe zyrtarët nepalezë thanë se parashikojnë "humbje në shkallë të madhe".