Një tërmet me magnitudë 5.1 goditi kaliforninë jugore të dielën, në veri të los angelesit, duke shkundur rajonin në një kohë kur banorët ishin të tmerruar për shkak të afrimit të stuhisë tropikale Hilary. Nuk kishte raporte të menjëhershme për dëme apo të lënduar nga tërmeti që u regjistrua në orën 2.41 minuta të pasdites, rreth 7 km në juglindje të komunitetit të kalifornisë jugore, Ojai, në kontenë Ventura. Tërmeti u ndoq nga disa paslëkundje të tjera, më të vogla në fuqi. Qendra amerikane e paralajmërimit për tsunami tha ndërkohë se nuk kishte kërcënim pas tërmetit. Shiu ndërkohë nuk po ndalet mbi kaliforninë e jugut, të dielën, ndërsa stuhia tropikale Hilary lëvizi mbi shtet pasi më herët kishte ndëshkuar gadishullin e Baja Kalifornisë. Para kësaj stuhie, SHBA-ja, Kanadaja dhe Meksika janë goditur edhe nga fatkeqësi të tjera klimatike gjatë këtij viti. Ishulli Maui i Hauait është ende duke u përballur me zjarre masive, që kanë vrarë mbi 100 njerëz dhe kanë shkatërruar qytetin historik të Lahainas. Ndërkohë, edhe zjarrfikësit në Kanada po përballen me një numër rekord të zjarreve masive këtë vit. Sipas autoriteteve, stuhia Hilary mund të godasë edhe shtetet në perëndim të SHBA-së me reshje të rralla shiu, duke u regjistruar si cikloni që ka sjellë më shumë reshje në Nevada, Oregon dhe Ajdaho. Në shtator të vitit 1939, një stuhi tropikale në Kaliforni shkatërroi shinat e trenit, nxori shtëpitë nga themelet e tyre dhe përmbysi shumë varka, duke vrarë afro 100 persona.