Presidenti amerikan Donald Trump do të tërhiqet nga përpjekjet për të ndërmjetësuar një marrëveshje paqeje mes Rusisë dhe Ukrainës brenda disa ditësh, nëse nuk ka shenja të qarta se një marrëveshje mund të arrihet, tha të premten Sekretari amerikan i Shtetit, Marco Rubio. "Ne nuk do të vazhdojmë me këtë përpjekje për javë dhe muaj të tërë. Kështu që ne duhet të përcaktojmë shumë shpejt, tani, dhe unë po flas për disa ditë, nëse kjo është e mundur apo jo në javët e ardhshme. Nëse është e mundur në rregull, nëse nuk është kështu, ne kemi prioritete të tjera për t'u fokusuar gjithashtu," tha Rubio në Paris, pas takimit me liderët evropianë dhe ata ukrainas. Rubio tha se Trump ishte ende i interesuar për një marrëveshje, por ishte i gatshëm të tërhiqej nëse nuk kishte shenja të menjëhershme përparimi. Trump premtoi gjatë fushatës së tij zgjedhore se do t'i jepte fund luftës brenda 24 orëve të para të tij në Shtëpinë e Bardhë. Ai e moderoi atë pretendim pas marrjes së detyrës, duke sugjeruar se një marrëveshje mund të arrihej deri në prill ose maj, ndërsa pengesat shtoheshin. Komentet e Rubios nënvizojnë zhgënjimet në rritje për mungesën e progresit në përpjekjet për të zgjidhur një seri sfidash gjeopolitike.