Britania, Kanadaja, Australia dhe Portugalia njohën të gjitha të dielën një shtet palestinez, në një veprim të frymëzuar nga frustrimi për luftën në Gaza dhe që synonte të promovonte një zgjidhje me dy shtete, duke shkaktuar një reagim të furishëm nga Izraeli. Vendimi i katër vendeve perëndimore, që tradicionalisht kanë qenë aleatë me Izraelin, i bashkoi ato me më shumë se 140 vende të tjera që mbështesin gjithashtu aspiratën e palestinezëve për të krijuar një atdhe të pavarur në territoret e pushtuara. Vendimi i Britanisë mbartte simbolikë të veçantë duke pasur parasysh rolin e saj të madh në krijimin e Izraelit si një komb modern pas Luftës së Dytë Botërore. "Sot, për të ringjallur shpresën e paqes për palestinezët dhe izraelitët, dhe një zgjidhje me dy shtete, Mbretëria e Bashkuar njeh zyrtarisht Shtetin e Palestinës", tha kryeministri Keir Starmer. "Kriza humanitare e shkaktuar nga njeriu në Gaza arrin rekorde negative të reja. Bombardimi i pamëshirshëm dhe në rritje i qeverisë izraelite ndaj Gazës, ofensiva e javëve të fundit, uria dhe shkatërrimi, janë krejtësisht të patolerueshme". Vende të tjera, përfshirë Francën, pritet të ndjekin shembullin këtë javë në Asamblenë e Përgjithshme të Kombeve të Bashkuara në Nju Jork. Kryeministri izraelit Benjamin Netanyahu e dënoi këtë veprim. "Kam një mesazh të qartë për ata udhëheqës që njohin një shtet palestinez pas masakrës së tmerrshme të 7 tetorit: Ju po i jepni një shpërblim të madh terrorizmit", tha ai. "Dhe kam një mesazh tjetër për ju: Kjo nuk do të ndodhë. Një shtet palestinez nuk do të krijohet në perëndim të lumit Jordan".