Përkeqësimi i kushteve të motit në Gjirin e Vlorës dhe në det të hapur ka sjellë pezullimin e lundrimit për mjetet e vogla lundruese dhe ato të peshkimit gjatë ditës së sotme. Sipas njoftimit zyrtar, priten erëra të forta në drejtimin jug-juglindje me forcë deri në 6–7 ballë, me shpejtësi 15 deri në 20 metra për sekondë, ndërsa dallgët mund të arrijnë deri në 2.5 metra lartësi. Për këtë arsye, është ndaluar lundrimi për të gjitha mjetet e vogla dhe ato të peshkimit që operojnë jashtë Gjirit të Vlorës, të paktën deri në orën 22:00 të mbrëmjes. Autoritetet u kanë bërë thirrje subjekteve që ushtrojnë aktivitet në fushën e detarisë të marrin masa për sigurimin e mjeteve në port dhe të rrisin gatishmërinë e ekuipazheve për të shmangur çdo situatë emergjente. Ndërkohë, anijet e transportit ndërkombëtar detar do të vijojnë operimin normalisht sipas destinacioneve përkatëse.