Në kuadër të operacioneve të policisë kufitare për parandalimin dhe goditjen e aktiviteteve të paligjshme në kufi, shërbimet e Stacionit të Policisë Kufitare Morinë, gjatë një kontrolli rutinë të automjeteve që hynin në Shqipëri, kanë ndaluar një automjet tip “Audi A8”. Gjatë kontrollit brenda automjetit, në të cilin udhëtonte një 44 vjeçar, banues në Prishtinë, është konstatuar se ai mbante një shumë prej 19 mijë eurosh, të cilat nuk i kishte deklaruar në pikën kufitare, siç kërkohet nga ligji i Shqipërisë për hyrjen dhe daljen e parave. Pas verifikimeve të kryera, janë ndërmarrë të gjitha procedurat ligjore për rastin, dhe materialet janë dërguar në Prokurorinë e Kukësit për veprime të mëtejshme. Ndërsa shoferi i mjetit është proceduar penalisht për mosdeklarimin e shumës së parave, të cilat janë sekuestruar në cilësinë e provës materiale.