CNN i ka kushtuar një artikull situatës së tensionuar në veri të Kosovës. Në një shkrim me titull “Pse tensionet etnike po ndizen sërish në veri të Kosovës?”, CNN shkruan se “serbët që protestojnë në Mitrovicë, qytetin etnikisht të ndarë ngritën sërish barrikada disa orë pasi Serbia tha se kishte vënë ushtrinë e saj në gatishmërinë më të lartë luftarake pas javëve të përshkallëzimit të tensioneve midis Beogradit dhe Prishtinës”. Ministria e Mbrojtjes e Serbisë tha se duke pasur parasysh ngjarjet e fundit në rajon dhe besimin e Beogradit se Kosova po përgatitej të sulmonte serbët dhe të largonte me forcë barrikadat, presidenti Aleksandar Vuçiç kishte urdhëruar ushtrinë dhe policinë e Serbisë të viheshin në gatishmërinë më të lartë. Nga ana e saj, Qeveria e Kosovës u bëri thirrje paqeruajtësve të NATO-s që të heqin barrikadat.