Situata është tensionuar këtë të martë përpara Kryeministrisë, ku u zhvillua protesta e 94-t radhazi kundër qeverisë. Protestuesit kanë tentuar të avancojnë drejt godinës dhe të hyjnë në ambientet e saj me argumentin se aty ndodhej kryeministri Rama dhe zyrtarë të tjerë, por janë ndalur nga forcat e policisë, të cilat kanë krijuar një kordon të përforcuar në hyrjet e institucionit. Tubuesit janë ndarë në dy grupe. Një pjesë përpara Kryeministrisë, ndërsa një grup tjetër u pozicionua pranë një prej hyrjeve të pasme, duke tentuar të afrohet drejt godinës. Policia blindoi zonën me efektivë dhe barriera, duke mos lejuar protestuesit të avancojnë. Nderkohë u afrua dhe nje autobot me ujë. Ndërsa ka pasur dhe shoqërime nga ana e policise. Protesta shënoi ditën e 94-t të mobilizimit, ndërsa kërkesa kryesore mbetet dorëheqja e kryeministrit Edi Rama, ndryshimi i klasës politike dhe krijimi i një qeverie tranzitore.