Vendi ynë prej ditësh është mbërthyer nga temperaturat e ulëta të cilat këtë herë nuk kanë përfshirë vetëm zonat malore, por edhe ato bregdetare. Muaji janar është paraqitur i ftohtë për të gjitha zonat e vendit nga veriu deri në jug, ndërsa disa akse rrugore vijojnë të paraqesin rrezik për drejtuesit e mjeteve për shkak të reshjeve të dëborës të cilat kanë përfshirë disa zona specifike të vendit. Mirëpo, ky acar I cili ka përfshirë Shqipërinë ka gjasa të vijojë edhe në muajin shkurt. Edhe pse jemi tashmë në gjashtë ditët e fundit të janarit, temperaturat e ulëta si duket do të vijojnë për një kohë të papërcaktuar. Së fundmi sinoptikania Lajda Porja ka bërë një paralajmërim sa i përket temperaturave në vend, ku është shprehur se me shumë gjasa temperaturat e ulëta dhe moti i acartë do të vijojë dëri në datën 5-6 shkurt. Po sipas Porjas, pas datës 6 shkurt pritet që të kemi temperatura normale. Më tej, në një emission televiziv Porja shtoi se deri në fund të muajit janar, temperaturat do të jenë të qëndrueshme dhe në rritje të lehtë.