Evropa do të shohë valë ekstreme të nxehti me temperatura deri në 50 gradë celcius, cdo tre vjet, nëse gazrat që shkaktojnë efektin serë do të vazhdojnë të emetohen me këto ritme. Ekspertët paralajmërojnë se nëse bota nuk merr masa, evropa mund të përballet me valë të tilla përvëluese të të nxehtit para vitit 2100. Shanset për më shumë evente të tilla, do të vazhdojnë të rriten – thonë ekspertët. Valët e të nxehtit, morën emër për të parën herë në Itali në 2017-ën, ku përvëlimi i verës së atij viti u quajt Lucifero. Në atë vit, e gjithë evropa jugore u përfshi nga i nxehti i madh me temperaturat që kapërcyen 40 gradët celcius. Në gusht 2021, Italia raportoi një tjetër valë të nxehti që shënoi një rekord evropian prej 48.8 gradësh celcius. Tani ekspertët thonë se shkenca është e prerë” sa më shpejt që të reduktohen emetimet, aq më shumë do të evitohen pasojat e rënda në ndryshimet e klimës. Analiza e re vjen ndërsa liderët dhe politikëbërësit nga e gjithë bota janë mbledhur bashkë për negociata në samitin e klimës në Glasgou. Disa vende kanë bërë premtime në konferencë, përfshirë Indinë, që ka njoftuar se do të reduktojë emetimet në zero deri në 2070-ën dhe kinën, që tha se do të arrijë neutralitetin e dioksidit të karbonit para 2060-ës.