Irani do ti përgjigjet cdo kërcënimi nga SHBA – tha shefi i rojave revolucionare iraniane, Hossein Salami, të mërkurën, ndërsa Uashingtoni po përgatitet të përgjigjet për vrasjen e tre trupave amerikane nga milicitë e mbështetura nga teherani. “Ne dëgjojmë kërcënime që vijnë nga zyrtarët amerikanë; u themi atyre se na kanë testuar dhe më parë dhe tani e njohim njëri tjetrin mirë. Asnjë kërcënim nuk do të lihet pa përgjigje”, tha Salami sipas agjencisë gjysmë-zyrtare të vendit, Tasnim. Në janar 2020, rojat revolucionare iraniane morën në shënjestër bazën amerikane Ain al Asad, në Irak, pas një sulmi amerikan me dronë në bagdad që vrau Kasem Soleimanin, komandantin e forcave elitë Quds, të rojave revolucionare iraniane. I dërguari i iranit në Kombet e Bashkuara, Amir Saeid Iravani, po ashtu paralajmëroi të mërkurën se Teherani do të përgjigjej me vendosmëri ndaj cdo sulmi në territorin e tij, mbi interesat e tij apo mbi shtetasit iranianë jashtë kufijve. Komentet e zyrtarëve iranianë vijnë një ditë pasi presidenti amerikan joe Biden tha se kishte marrë një vendim se si do ti përgjigjej sulmit me dron nga grupet e mbështetura nga irani, që vranë pjesëtarë të ushtrisë amerikane në Jordani por pa dhënë më shumë detaje. Disa pjesëtarë të rojave revolucionare iraniane janë vrarë ndërkohë pas sulmeve izraelite në siri, me pesë prej tyre që humbën jetën në 20 janar dhe dy të tjerë më 25 dhjetor. Të hënën, një tjetër sulm izraelit goditi atë që Tasnim e quajti një qendër iraniane të këshillimit ushtarak në Siri duke vrarë dy persona, por i dërguari iranian në siri nuk dha detaje për sulmin dhe tha se të lënduarit nuk ishin iranianë. Më 15 janar ndërkohë irani sulmoi atë që tha se ishte shtab i spiunëve izraelitë në rajonin gjysmëautonom të irakut, kurdistan.