Disa të shtëna me armë zjarri u shënuan në degën e PD në Kurbin, në kohën kur Rithemelimi po zhvillonte një mbledhje për primaret. Nënkryetari i degës së PD në Kurbin Kastriot Marku u konfliktua me anëtarin Van Rica, për pasojë ky i fundit nxori armën dhe qëlloi në ajër. Mësohet se kandidatët e primareve të ish kryeministrit Sali Berisha, u bënë shkak për sherrin mes këtyre dyve. Policia e Kurbinit në një njoftim zyrtar, tha se fatmirëisht nuk ka patur persona të lënduar, por vetëm shkrepje arme. Van Rica është shpallur në kërkim, pasi akuzohet për kryerjen e veprave penale “Mbajtja pa leje e armëve, armëve shpërthyese dhe municionit”, "Kanosja” dhe “Prishja e qetësisë publike”. Efektivët shoqëruan në komisariat disa persona, të cilët ishin të pranioshëm gjatë konfliktit mes Markut dhe Ricës, për tu marrë në pyetje lidhur me ngjarjen, Policia sekuestroi armën e zjarrit tip pistoletë me të cilën dyshohet se ka qëlluar anëtari. Materialet procedurale iu referuan Prokurorisë së Rrethit Gjyqësor Kurbin për veprime të mëtejshme.