Katër persona kanë humbur jetën dhe më shumë se 20 të tjerë janë plagosur nga disa të shtëna masive në një zonë argëtimi në Birminghem të Alabamës në SHBA, sipas policisë dhe raporteve të mediave. Shumë persona u qëlluan në zonën Five Points South, tha Departamenti i Policisë së Birminghemit në një postim në rrjetet sociale. Zyrtarët thanë se të shtënat që shkaktuan deri në 21 të plagosur ndodhën pak pas orës 11 të natës. Sipas tyre kishte “dhjetëra viktima të qëlluara me armë zjarri” dhe të paktën katër kishin “plagë të rrezikshme”. Shërbimi i Zjarrfikësve dhe Shpëtimit, në Birminghem shpalli tre të vdekur në vendngjarje dhe një person i katërt u shpall i vdekur në Spitalin e Universitetit të Alabamës në Birminghem. Policia tha se viktimat e gjetura të vdekur në vendngjarje përfshinin dy burra dhe një grua. Të lënduarit e tjerë u transportuan në spitale me mjete private. Policia e Birminghemit nuk iu përgjigj pyetjeve të dërguara nga agjencia e lajmeve Associated Press që kërkonte informacion të mëtejshëm. Zona Five Points South e Birminghemit ka shumë vende argëtimi, restorante dhe bare dhe shpesh është e mbushur me njerëz netët e së shtunës. Policia tha se nuk kishte arrestime të menjëhershme. “Do të bëjmë gjithçka që është e mundur për të zbuluar, identifikuar dhe ndjekur atë që është përgjegjës për sulmin ndaj kalimtarëve”, thanë zyrtarët e policisë.