Kryeministri Edi Rama, në daljen e tij të parë pas fitores në zgjedhjet vendore, tha se kjo është një fitore shumë e madhe dhe se të gjithë duhet “të ruhemi nga era e fortë dehëse” e saj. Ai paralajmëroi një tur falenderimi në gjithë Shqipërinë, duke nisur nga qyteti i Shkodrës. RAMA - Kjo është një fitore shumë e madhe për t’u festuar dhe unë vetë ndihem shumë i vogël, përballë hartës së mbushur me ngjyrat e fitores së kandidatëve tanë nga Tropoja në Konispol. Kam dhe besoj kemi të gjithë nevojë të ruhemi nga era e fortë dehëse e një fitoreje si kjo. Unë e kam të nevojshme të shkoj sa më shpejt në Shkodër, për të nisur nga qyteti më i bekuar nga Zoti dhe më i keqtrajtuar nga robi, një tur falenderimi në të gjithë Shqipërinë. Rama tha se tani nuk është koha për t’u marrë me retorikë politike me opozitën dhe se vetë do të përqëndrohet të realizojë zotimet e dhëna gjatë fushatës.