Në tre muajt e parë të këtij viti janë shënuar në total 391 aksidente rrugore, 89 prej tyre vetëm gjatë muajit mars. Të dhënat e Institutit të Statistikave tregojnë një bilanc prej 117 personash të përfshirë në aksidente në mars, si pasojë e të cilave kanë mbetur të plagosur apo kanë ndërruar jetë. Grupmosha më e predispozuar për t’u përfshirë në aksidente, rezulton të jetë 25 deri në 34 vjeç, duke përbërë 32.6 për qind të numrit total të aksidenteve të regjistruara në këtë periudhë. Më pak të përfshirë janë moshat më të reja të cilat sapo janë pajisur me leje drejtimi, kjo sepse sipas ekspertëve pasi fitojnë vetëbesim të tepruar në drejtimin e automjetit, shoferët mund të gabojnë më lehtësisht.