Sot është Dita e Rinisë, por vendit i mungojnë të rinjtë. Në 13 vite popullsia është tkurrur me 45% dhe një nga faktorët më të mëdhenj mbetet emigrimi. Shumica e shqiptarëve të grupmoshës 15 deri në 29 vjeç e shohin largimin nga vendi si zgjidhjen kryesore për jetën e tyre. Të dhënat e INSTAT tregojnë se në vitin 2024 në të gjithë vendin kishte vetëm 405 mijë të rinj të moshës 15–29 vjeç, ose 45 për qind më pak se në censin e vitit 2011. Ndërkohë sipsa revistës Monitor më shumë se një e katërta e të rinjve shqiptarë gjenden në të 30-tat e tyre pa asnjë zanat, arsim profesional apo të lartë të përfunduar dhe për më tepër nuk janë në asnjë lloj pune. Në arsim, të dhënat e vitit 2024–2025 tregojnë se numri i nxënësve dhe studentëve po vazhdon të tkurret. Regjistrimet në sistemin parauniversitar kanë rënë, veçanërisht në arsimin 9-vjeçar, ndërsa edhe universitetet po përballen me më pak aplikime dhe më shumë braktisje. Duke iu referuar të dhënave të Instat numri total I nxënësve të regjsitrruar në të gjitha nivelet arsimore gjatë peiudhës 2020-2025 ka rënë me rreth 61 mijë, që përbën një tkurrje prej 10%. Ndërsa gjatë dekadës nga viti 2015 deri më 1 janar 2025, numri i nxënësve në arsimin parauniversitar ra me mbi 31%, ose 112 mijë më pak. Kjo tkurrje demografike po bën që vendi të ketë gjithnjë e më pak të rinj që hyjnë në sistemin arsimor, por dhe më pak fuqi punëtore të kualifikuar prë të ardhmen.