Tre të dyshuarit për vrasjen e 56-vjeçarit Anesti Rama në fshatin Frashër të Patosit u paraqitën këtë të hënë në Gjykatën e Shkallës së Parë Fier për t’u njohur me masën e sigurisë. Viktima u dhunua për vdekje në banesën e tij, ndërsa ngjarja fillimisht u paraqit nga familjarët si vdekje natyrale. Të pandehurit janë Emanilda Rama dhe Valbona Rama, vajza dhe bashkëshortja e viktimës, si dhe Çlirim Dogani, të cilët akuzohen për bashkëpunim në kryerjen e krimit. Sipas burimeve nga mbrojtja, nëna dhe vajza kanë dhënë disa deklarata kontradiktore gjatë hetimeve, duke krijuar dyshime për përpjekje për fshehje të së vërtetës. Avokati mbrojtës theksoi se mungesa e pendesës dhe qetësia në qëndrimet e tyre është shqetësuese. Hetimet janë ende në vijim dhe priten rezultatet e analizave të ADN-së për të sqaruar rrethanat e ngjarjes dhe rolin konkret të Çlirim Doganit. Të tre të pandehurit janë lënë në masën e sigurisë arrest me burg.