Qindra e mijëra të rinj mbushën një fushë të gjerë në periferi të Romës të shtunën për të parë Papa Leonin, në eventin më të madh deri më tani për papën e ri katolik, si pjesë e një fundjave të veçantë që synon inkurajimin e të rinjve katolikë. Të rinj nga më shumë se 146 vende, disa me shami shumëngjyrëshe për tu mbrojtur nga dielli i nxehtë i verës, u shtynë pas rrethimit në fushën Tor Vergata ndërsa Leoni përshëndeste turmën mbi papamobilin e tij të bardhë. Papa, duke buzëqeshur, përshëndeti, ofroi bekime dhe herë pas here kapi edhe kafshë të vogla prej pelushi dhe flamuj kombëtarë që hidheshin nga të rinjtë ndërsa ai kalonte. "Të dashur të rinj ... lutja ime për ju është që të mund të jetoni në besim, me gëzim dhe guxim," tha Leoni në fjalën e tij drejtuar turmës. "Kërkoni drejtësi për të ndërtuar një botë më humane", tha ai. "Shërbejini të varfërve dhe kështu dëshmoni më të mirën që do të donim gjithmonë të merrnim nga fqinjët tanë". Shumë nga të rinjtë që morën pjesë në eventin me Papën e kaluan gjithë ditën duke pritur në fushë me temperaturat që iu afruan 30 gradëce celcius. Organizatorët përdorën topat e ujit për të ndihmuar në freskimin e turmës. "Për mua, është një emocion i pabesueshëm sepse nuk kisha qenë kurrë më parë në një event si ky", thotë Maya Remorini, nga rajoni i Toskanës në Itali. Ajo tha se grupi i saj kishte mbërritur rreth orës 5 të mëngjesit në shesh. Shumë nga të rinjtë qëndruan madje gjatë gjithë natës në fushë, për të patur një shans të dytë për të parë papën në meshën e të dielës. Ngjarjet e fundjavës lidhen me Vitin e Shenjtë Katolik në vazhdim, për të cilin Vatikani thotë se ka tërhequr rreth 17 milionë pelegrinë në Romë që nga fillimi i tij. Leoni, papa i parë i lindur në SHBA, u zgjodh më 8 maj nga kardinalët e botës për të zëvendësuar të ndjerin Papa Françesku.