Deputetja demokrate, Jorida Tabaku këtë të premte zhvilloi një takim me përfaqësues të rreth 50 bizneseve gjermane, në një aktivitet të organizuar nga Konrad-Adenauer-Stiftung. Gjatë diskutimit, Tabaku ndau me përfaqësuesit e biznesit gjerman jo vetëm potencialin e Shqipërisë, por edhe kufizimet reale të modelit aktual ekonomik, i cili sipas saj nuk po prodhon zhvillim të qëndrueshëm dhe nuk po tërheq investime cilësore. ‘Duhet të kalojmë drejt një modeli tjetër, një modeli që prodhon vlerë, që mbështet industrinë dhe që tërheq investime produktive, të cilat sot mungojnë,’ u shpreh ajo. Deputetja e PD theksoi se rruga e vetme strategjike për vendin mbetet integrimi në Bashkimi Evropian, por nënvizoi se integrimi nuk mund të vijë në kushtet e një ekonomie të deformuar nga mungesa e konkurrencës dhe nga orientimi i gabuar i investimeve. Ajo i ftoi bizneset gjermane të konsiderojnë Shqipërinë si një destinacion për investime afatgjata në sektorë strategjikë, duke theksuar se vendi ka potencial real për t’u bërë pjesë e zinxhirëve të ri të furnizimit në Europë.