Rusia beson se ka ende kohë për të parandaluar një garë armatimesh në hapësirë duke hartuar një traktat ndërkombëtar ligjërisht të detyrueshëm për të ndaluar vendosjen e armëve sulmuese atje dhe u bëri thirrje Shteteve të Bashkuara dhe vendeve të tjera të lënë mënjanë skepticizmin në lidhje me këtë ide. Zëvendësministri i jashtëm rus, Sergei Ryabkov, i bëri komentet pasi SHBA pranoi këtë javë se Pentagoni po operon armë në orbitën e Tokës, një moment historik në militarizimin e hapësirës. Duke folur në një konferencë për shtyp në Moskë, Ryabkov tha se Shtetet e Bashkuara nuk e kishin njoftuar Rusinë - një nga tre fuqitë kryesore hapësinore në botë - për aftësinë e tyre të re të armëve në hapësirë, por tha se deklarata e SHBA-së nuk kishte ardhur si surprizë. “Kjo nuk është asgjë e re për ne; ne po e monitorojmë të gjithë këtë, po regjistrojmë gjithcka dhe po nxjerrim përfundimet e duhura”, tha ai, duke vënë në dukje se Moska kishte folur prej kohësh për nevojën e një traktati që do të përjashtonte përdorimin e forcës në hapësirë ose kërcënimin e forcës kundër objekteve në hapësirë. “Amerikanët dhe perëndimorët, veçanërisht britanikët, për shumë vite kanë përdorur justifikime për të mbuluar mungesën e gatishmërisë së tyre për të lëvizur në këtë drejtim; ata kërkojnë argumente të rreme për ta shmangur këtë dhe përpiqen të ndryshojnë situatën duke na akuzuar për aktivitete të cilat, sipas tyre, janë destabilizuese”, tha Ryabkov. “Por ne besojmë se nuk është ende vonë për të krijuar një mjedis që do të përjashtonte një garë armatimesh me rreziqe në rritje të konfliktit të hapur në hapësirën e jashtme.”