Kryeministri Edi Rama prezantoi drejtuesen e re të Kasadastrës, Dallëndyshe Bicin, pas dorëheqjes së Artan Lames. Me këtë ndryshim, Agjencinë Shtetërore të Kadastrës e presin ndryshime strukturore dhe funksionale. Rama u shpreh se do të krijohet një task force brenda Kadastrës, për të venë para përgjegjësisë të gjithë punonjësit që abuzojnë me detyrën dhe japin favore të paligjshme. “Duhet patjetër që të merren masa shumë serioze lidhur me bishtat e të keqes në institucion, me bishtat e pisllëkut edhe të korrupsionit që janë të kudondodhur në Kadastër, në të gjithë territorin dhe drejtorja e re, një nga detyrat që ka është që të merret drejtpërdrejtë me një task forcë të brendshme për të çuar aty ku duhet dhe aty ku e kanë vendin të gjithë punonjësit dhe të gjithë ata në kadastër që kanë luajtur bishtin e institucionit për interesat e tyre.”