Shqiptarët shpenzojnë më shumë për ushqime se çdo vend tjetër në rajon, duke bërë që një e pesta e ekonomisë të shkojë për nevojat bazë. Vendi vazhdon të kryesojë në Ballkan dhe në Europë për peshën që zënë shpenzimet për ushqime në ekonomi. Sipas të dhënave të Eurostat, të përpunuara nga Monitor, gjatë vitit 2025 shqiptarët shpenzuan për ushqime rreth 20.4% të Prodhimit të Brendshëm Bruto që përkthehet në afro 5 miliardë euro në vit. Të dhënat tregojnë se, pavarësisht rritjes ekonomike, familjet shqiptare vazhdojnë të përdorin një pjesë të madhe të të ardhurave për nevojat bazë. Në Bashkimin Europian, mesatarja e shpenzimeve për ushqime është vetëm 6.2% e PBB-së, ndërsa edhe vendet fqinje si Serbia, Maqedonia e Veriut dhe Bosnja e Hercegovina kanë nivele më të ulëta se Shqipëria. Një nga arsyet kryesore është rritja e çmimeve të ushqimeve. Sipas Eurostat, në vitin 2025 çmimet e produkteve ushqimore në Shqipëri ishin rreth 3% më të larta se mesatarja e Bashkimit Europian, ndërkohë që të ardhurat e shqiptarëve mbeten më pak se gjysma e mesatares europiane. Në terma praktikë, çdo shqiptar shpenzoi mesatarisht 2349 euro për ushqime gjatë vitit 2025. Ekspertët vlerësojnë se pesha e lartë e këtyre shpenzimeve tregon se familjeve u mbeten më pak të ardhura për strehim, arsim, shëndetësi, transport dhe aktivitete të tjera, duke reflektuar nivelin ende të ulët të mirëqenies ekonomike në vend.