Burgu i Shënkollit duhet të mbyllet sa më parë, ndërsa personat që trajtohen aty duhet të transferohen në një strukturë të specializuar shëndetësore. Ky është përfundimi i Avokatit të Popullit, pas inspektimit të paparalajmëruar këtë të hënë në këtë institucion, duke e cilësuar një shkelje të rëndë të të drejtave të njeriut. ‘Problemi i parë është që kjo nuk duhet të jetë një IEVP sepse këta nuk janë persona që po vuajnë dënimin. Këta janë persona ndaj të cilëve është marrë një masë mjekësore sepse ata nuk kanë zotësi për të vepruar, pra nuk kanë kuptuar pasojat e veprimeve të tyre. 12 veta në një dhomë në kushte që janë denigruese për të drejtat e njeriut, janë shkelje direkte e të drejtave të njeriut. Ajo që ne konstatojmë është që këtu duhet në mënyrë urgjente ndërhyrje, duhet që këtu të kemi një spital me siguri të shtuar, jo një burg me dy psikiatër. Pra këtu ka mungesë ekstreme të stafit mjekësor, këtu ka kushte jashtëzakonisht të rënda. Një pjesë e godinës është e pabanueshme, pra është për t'u shembur.’