Turqia do të bëjë përpjekje për të rindërtuar infrastrukturën e shkatërruar, spitalet dhe shkollat në Rripin e Gazës nëse arrihet armëpushim, thotë presidenti turk, Recep Tayyip Erdogan. “Nëse arrihet armëpushim, ne do të bëjmë gjithçka që është e nevojshme për të kompensuar shkatërrimin e shkaktuar nga Izraeli”, u tha Erdogan gazetarëve që gjendeshin në avionin me të cilin lideri turk po kthehej nga Gjermania. “Ne do të bëjmë përpjekje të rindërtojmë infrastrukturën e dëmtuar në Gazë dhe të rindërtojmë shkollat e shkatërruara, spitalet dhe ndërtesat e ujit dhe energjisë”, tha Erdogan. Izraeli deri më tani ka refuzuar thirrjet për armëpushim, duke thënë se do të vazhdojë operacionet ushtarake në Rripin e Gazës deri sa të shkatërrojë Hamasin dhe të lirojë pengjet e marra nga Hamasi. Turqia ka kritikuar ashpër Izraelin për luftën në Gazë. Më herët gjatë javës, Erdogan i bëri thirrje kryeministrit izraelit, Benjamin Netanyahu, të tregojë nëse Izraeli ka armë bërthamore dhe gjatë bisedës me gazetarë, ai bëri thirrje që në Izrael të kryhen inspektime për armë bërthamore. “Si shtet, ne bëjmë thirrje që të inspektohen armët bërthamore të Izraelit dhe të hiqet çdo dyshim, para se të jetë shumë vonë”, tha ai. Erdogan tha po ashtu se familjarët e izraelitëve që po mbahen pengje nga Hamasi i kanë dërguar atij një letër, duke i kërkuar që të ndërhyjë në mënyrë që ata të lirohen. Presidenti turk tha se agjencia turke e inteligjencës në mënyrë aktive po e shqyrton këtë çështje.