Të dhënat e Bankës së Shqipërisë konfirmojnë raportimet nga tregu i pasurive të paluajtshme për një rritje të pashoqe të blerjeve nga ana e shtetasve të huaj. Sipas Bankës së Shqipërisë investimet e huaja direkte në vendin tonë arritën në 1.1 miliardë euro në periudhën janar-shtator. Nga këto, 250 milionë euro shkuan vetëm për blerje pronash, kryesisht apartamentesh dhe rezidenca në bregdet dhe Tiranë. Sektori i dytë i preferuar nga të huajt është ai i hidrokarbureve me 160 milionë euro, energjitika em 150 milionë euro investime direkte dhe ndërmjetësimi financiar me 110 milionë euro. Shifrat e raportuara nga Banka e Shqipërisë sugjerojnë se këtë vit, investimet e huaja direkte mund të tejkalojnë 1.37 miliardë eurot e vitit të kaluar, që është edhe rekordi më i mirë i regjistruar ndonjëherë. Ndërkohë, stoku i investimeve të huaja direkte në vend pritet që këtë vit të tejkalojë shifrën e 12 miliardë eurove, nga 11.34 miliardë që u raportuan në fund të vitit të kaluar.