Administrata e presidentit amerikan, Donald Trump, thotë se studentët e huaj në Universitetin elitar të Harvardit, së shpejti, do t'i përkasin së shkuarës. Sekretarja e Sigurisë Kombëtare të SHBA-së, Kristi Noem, e justifikoi heqjen e lejes për të pranuar studentë të huaj nga universiteti prestigjoz, duke përmendur, ndër të tjera, "refuzimin" e Harvardit për të krijuar një mjedis të sigurt për studentët hebrenj dhe politikat e universitetit për mundësi të barabarta. Universiteti u lejoi "agjitatorëve antiamerikanë dhe pro-terroristë" që të sulmonin studentët hebrenj në kampus. Pa dhënë asnjë provë, Departamenti i Sigurisë Kombëtare akuzoi gjithashtu Harvardin për bashkëpunim me Partinë Komuniste Kineze. Thuhet, se ky hap u ndërmor pasi universiteti refuzoi të jepte informacion në lidhje me disa studentë të huaj. Në një letër drejtuar Harvardit, Noem deklaroi se sanksioni ishte "rezultati fatkeq i dështimit të Harvardit për të përmbushur kërkesat e thjeshta të raportimit". Sekretarja e Sigurisë Kombëtare tha se Harvadi mund ta rifitonte autorizimin për të pranuar studentë ndërkombëtarë nëse do të paraqiste një mori dokumentesh mbi studentët e huaj brenda 72 orëve. Gati 6,800 studentë të huaj janë të regjistruar në Harvard, më shumë se një e katërta e trupës studentore. Studentët që janë regjistruar tashmë duhet të ndryshojnë universitet ose të humbasin statusin e qëndrimit, deklaroi universiteti. "Veprimet e qeverisë janë të paligjshme, dhe ne jemi plotësisht të përkushtuar për të ruajtur aftësinë e Harvardit për të mirëpritur studentë dhe studiues ndërkombëtarë, të cilët vijnë nga më shumë se 140 vende dhe e pasurojnë Universitetin, dhe Amerikën, pa masë", thuhet në deklaratë. Universiteti e quajti këtë veprim një "masë hakmarrëse" që kërcënon të shkaktojë dëme serioze për universitetin dhe minon misionin akademik dhe kërkimor të Harvardit.