Mbi 10 mijë punëtorë të huaj të regjistruar në Shqipëri nga 20 mijë që është totali vijnë nga vetëm tre vende. Të dhënat e siguruara nga revista Monitor tregojnë se në fund të qershorit të këtij viti, punonjësit me origjinë nga Filipinet, India dhe Egjipti përbëjnë gjysmën e të huajve me kontratë punësimi të rregullt në Shqipëri. Shpërndarja e tyre është kryesisht në tre sektorë të ekonomisë. Filipinasit janë kryesisht në sektorin e shërbimeve, hotelerisë dhe bareve dhe restoranteve, indianët kryesisht në sektorin e ndërtimit dhe egjiptianët në sektorin e ndërtimit dhe peshkimit. Filipinasit përbëjnë numrin më të madh të të huajve të punësuar në Shqipëri, çka sugjeron se sektori i shërbimeve në turizëm po kërkon tregjet e largëta aziatike për të përmbushur boshllëkun e fuqisë punëtore në vend, sidomos gjatë sezonit të verës. Ndërkohë, numrit prej 20 mijë të punësuarish në Shqipëri u shtohen 2300 të vetëpunësuar të huaj. Në këtë kategori, italianët dhe shqiptarët e Kosovës përbëjnë gjysmën, ndjekur më pas nga turqit dhe amerikanët.