Kryetari i Grupit Parlamentar të Partisë Demokratike, Gazment Bardhi, ka akuzuar qeverinë për atë që e cilëson si një nga aferat më të mëdha korruptive në sektorin e energjisë, lidhur me kontratën e termocentraleve lundruese në Vlorë,’ Tigri 1’ dhe ‘Tigri 3’. Nëpërmjet një postimi në rrjetet sociale, Bardhi tha se mbi një vit më parë ka dorëzuar në SPAK prova zyrtare që, sipas tij, ngrenë dyshime serioze për abuzime në procesin e dhënies së kontratës. Ai pretendon se Shqipërisë i është shkaktuar një dëm prej të paktën 80 milionë eurosh, ndërsa fituesi i tenderit, sipas tij, ishte paracaktuar përpara hapjes së procedurës. ‘Nga janari 2024 deri në prill 2026, “Tigri 1” dhe “Tigri 3” kanë prodhuar vetëm 102 mijë megavat-orë energji. Në 28 muaj kanë prodhuar aq sa Shqipëria konsumon në afërsisht pesë ditë. SPAK-u e di edhe se kontrata parashikonte 850 mijë megavat-orë në vit. Pra, gjatë kësaj periudhe, është prodhuar vetëm rreth 5 për qind e detyrimit kontraktor.’-shkruan më tej Bardhi. Deputeti demokrat hodhi akuza drejt SPAK-ut se ndonëse disponon të gjitha të dhënat për kontratën, ende nuk ka ngritur akuza ndaj Ramës dhe Ballukut. Ai shtoi se qeveria parashikon të shpenzojë edhe rreth 20 milionë euro të tjera për operimin dhe mirëmbajtjen e termocentraleve, të cilët nuk po japin rezultatet e premtuara.