Në 36 vite, Partia Demokratike ka zgjedhur 19 herë kryetarin e saj, përmes proceseve që kanë njohur trajta të ndryshme, herë si garë e fortë, e herë me rivalë formal dhe rezultat të njohur. Këtë vit shënohet hera e katërt në histori, që demokratëve u ofrohet vetëm një kandidat në fletën e votimit. Sali Berisha nuk ka pasur rivalë edhe në proceset e votimit të zhvilluar në vitet 2001 dhe 2005. Në dhjetor të vitit 1990, Azem Hajdari mori ushtrimin e detyrës së kryetarit, pa votim. Ndërkohë që në shtator të vitit 1991, për lidershipin e selisë blu garuan Neritan Ceka, Azem Hajdari dhe Sali Berisha, i cili fitoi kryesmin e Partisë Demokratike. Ndër vite, rastet kur gara është zhvilluar me rival formal dhe rezultat thuajse të paracaktuar ka qënë në zgjedhjet e 1996 në përballjen e Ferdinant Xhaferrit dhe Tritan Shehut, i cili u zgjodh kryetar, po ashtu në dy proceset zgjedhore të viteve 1997 dhe 1999 ku Sali Berisha garonte përballë Pjetër Arbnorit dhe Uran Butkës. Ndërkohë edhe zgjedhjet e majit të vitit 2022 ku Berisha garonte përballë Ibsen Elezit mund të konsiderohen thjesht zgjedhje formale. Garë e fortë në Partinë Demokratike që shënjoi rrjedhën e historisë së saj, ka qënë ajo e korrikut të vitit 2013 mes Lulzim Bashës dhe Sokol Olldashit. Fitorja e Bashës solli atë që në perceptimin publik u interpretuar si një lidership në hije të Sali Berishës, të cilin Basha do e përjashtonte vite më vonë pas shpalljes non-grata nga Shtetet e Bashkuara të Amerikës. Ajo që u duk të ishte një atë-vrasje politike, rizgjoi ambicien e Berishës për të rimarrë frenat e selisë së Partisë Demokratike përmes procesit të njohur si rithemelimi. Këtë vit në fletët e votimit, demokratëve u serviret vetëm një emër, i cili ka dominuar gjithë historinë e selisë blu: Sali Berisha. Referndumi i demokratëve do të rikonfimojë në drejtimin e partisë më të madhe opozitare në vend Berishën, pasi të gjithë aspirantët e tjerë për t’i zënë karrigen nuk u legjitimuan.