Aksidenti tragjik në Durrës ku humbën jetën teksa luanin në trotuarin e lagjes dy fëmijë të mitur, u pasua me akuza nga palët politike, me socialistët që i bënë thirrje policisë të bëjë shembull ‘të fortët e lagjes’ dhe demokratët që thonë se në fakt autori i ngjarjes kishte lidhje me Partinë Socialiste. Në komisionin e ligjeve, deputeti i Durrësit Arkend Balla e distancoi forcën e tij politike nga autori i aksidentit, Nikoll Radaçi. Arkend Balla : “Autori që shkaktoi këtë aksident që duhet të konsiderohet vrasës, nuk është mbështetës i Partisë Socialiste dhe banorët e zonës e dinë fare mirë se cilën parti ka mbështetur ai. Dhe e dyta gjë që dua të sqaroj, autori është larguar në këmbë dhe nuk është dorëzuar në bar kafet e mia. Pronari i kafeve është mbështetës i PS dhe anëtar i këshillit bashkiak dhe është një njeri i nderuar në atë zonë dhe ska lidhje me dorëzimin e autorit në këtë biznes.” Kryetari i komisionit të ligjeve, Ulsi Manja deklaroi se së bashku me kolegë të tjerë të Partisë Socialiste do propozojnë në Kuvend ndryshime në kodin rrugor dhe penale, pas ngjarjes të rëndë.