Turistëve u është thënë të kontrollojnë për paralajmërime përpara se të ngjiten drejt majës së malit Etna në Itali, pasi një shpërthim i detyroi ata të nxitonin për siguri, një ditë më parë. Pamjet video nga shpërthimi i së hënës treguan dhjetëra njerëz duke nxituar poshtë një shtegu ndërsa një re e madhe hiri ngrihej pas tyre nga vullkani në anën lindore të ishullit të Siçilisë. Salvo Cocina, kreu i Departamentit të Mbrojtjes Civile të Siçilisë, tha se dhjetëra alpinistë kishin guxuar të ngjiteshin në malin Etna pavarësisht një paralajmërimi të lëshuar herët të hënën në mëngjes pas shenjave fillestare të rritjes së aktivitetit në vullkanin më të madh aktiv të Evropës. "Pati një shpërthim të madh dhe një krater u shemb, por për fat të mirë ra në një zonë të shkretë", i tha ai Reuters të martën. "Është shumë e vështirë të bllokosh aksesin, nuk mund ta rrethosh gjithë malin", shtoi ai. Cocina tha se ata që ishin në mal të hënën, ishin ngjitur deri në një lartësi prej rreth 2,700 metrash dhe dukeshin të pajisur siç duhet, por ai pranoi nevojën për të balancuar shqetësimet e sigurisë me dëshirën e turistëve për të shijuar pamjet. Askush nuk u lëndua në shpërthimin e së hënës dhe alarmi për aktivitet vullkanik u ul në nivelin standard; "të verdhë", të martën.