Takimi elektoral i radhës i kryedemokratit, Lulzim Basha është zhvilluar në qytetin e Shkodrës. Edhe pse reshjet e dendura të shiut nuk kanë të ndalur, mbështetësit e Partisë Demokratike vendosën që ta prisnin. Gjatë fjalës së tij lideri i opozitës tha se 25 prilli do të sjellë ndryshimin që prej 8 vitesh i ka munguar vendit. Basha i bëri thirrje qytetarëve që të votojnë masivisht dhe t’i japin fund mashtrimeve të qeverisë Rama. “12 orë na ndajnë nga heshtja elektorale. 2 ditë e 12 orë na ndajnë nga fitorja. Mos e ndalni asnjë çast punën, derë më derë derisa sa çdo kuti ndryshimi të mbushet me votat e ndryshimit. Ndryshimi që po vjen është për çdo familje dhe asnjë njeri nuk mund të mungojë. Ora po afron që Shkodra të marshojë kryelartë. Fitorja e ditës së dil do të fillojë nga Shkodra e do të zbresë deri në skajin më jugor të vendit. Kjo do të jetë fitorja më e thellë dhe më e bukur sepse do t’i takojë çdo shkodraneje dhe çdo shkodrani. Do t’i takojë të gjithë shqiptarëve.