Të majtët i qëndruan strikt vendimit politik të Edi Ramës që para Kuvendit, të flasë Gjykata Kushtetuese për çështjen ‘Balluku’; duke injoruar totalisht kërkesën e Partisë Demokratike që këtë të martë të rimblidhej këshilli për rregulloren, mandatet dhe imunitetin për të çuar përpara shqyrtimin e kërkesës së SPAK-ut, për t’i hequr imunitetin numrit dy të qeverisë. Me argumentin se rregullorja njeh vlefshmërinë e mbledhjes së këshillit me kërkesë të gjysmës së deputetëve anëtarë, demokratët u ulën në mënyrë simbolike në sallën e këtij këshilli, edhe pse karriget e socialistëve qëndruan bosh. : “Njësoj si kriminelët që i fshihen drejtësisë edhe kolegët e mazhorancës janë të fshehur. Kolegët e mazhorancës nuk janë paraqitur në një mbledhje të vlefshme. Pengimi i drejtësisë me urdhër politik të Edi Ramës është akti më i rëndë që ka kryer Kuvend gjatë këtyre viteve demokraci.” Gazment Bardhi u ndal në detajet e kërkesës së SPAK, ku thuhet se pozita penale e Ballukut është rënduar ndaj Kuvendi duhet ta zhveshë nga imuniteti parlamentar për t’i hapur rrugën ashpërsimit të masave të sigurisë.