Gjithnjë e më shumë njerëz po largohen nga Turqia për të kërkuar një jetë më të mirë dhe më të sigurt në Gjermani. Dhe ka disa arsye për këtë. Sipas të dhënave, më shumë se 23 mijë shtetas turq aplikuan për azil në Gjermani deri në fund të korrikut të vitit 2023. Sipas Zyrës Federale për Migrim dhe Refugjatë (BAMF), kjo është një rritje prej 203 për qind krahasuar me të njëjtën periudhë të vitit të kaluar. Në Indeksin e Vendit të Origjinës 2023, Turqia renditet e treta pas Afganistanit dhe Sirisë. Nëse shikojmë vetëm korrikun, Turqia renditet madje e dyta pas Sirisë, me 3.791 aplikime. E ky nuk është një zhvillim befasues për ekspertët turq. Shumëkush e kishte parashikuar këtë mundësi pas rizgjedhjes së presidentit turk Rexhep Tajip Erdogan në këtë post. "Të paktën gjysma e atyre që nuk votuan për Erdoganin janë të zhgënjyer," thotë Dündar Kelloglu, një avokat dhe anëtar bordi i Këshillit të Refugjatëve të Saksonisë së Ulët. Kjo gjysmë kishte shpresuar një ndryshim të qeverisë dhe përmirësimin e situatës politike dhe ekonomike. Kelloglu vëren se një depresion i thellë po përhapet aktualisht në mesin e opozitës në vend. "Nuk ka pasur asnjë atmosferë kaq pesimiste pas grushtit të shtetit ushtarak të vitit 1980”, thotë ai për DË. Sipas tij, situata politike është ende shumë e tensionuar. Persekutimi i disidentëve vazhdon pa pushim.