Replika të ashpra pati pas mesnatës në Kuvend mes kreut të grupit parlamentar të Partisë Demokratike, Gazment Bardhi dhe kryeministrit Edi Rama. Bardhi e akuzoi Ramën se po hakmerret ndaj gjyqtarëve dhe prokurorëve duke mos u dhënë pagat pikërisht sepse ata i trokitën në derë për Belinda Ballukun. ‘Në vitin 2016 ishe entuziast që gjyqtarët dhe prokurorët ta kishin pagën sa më të lartë, sepse e projektoje reformën e drejtësisë si kamxhik ndaj opozitës. Por, sapo prokurorët dhe gjyqtarët të trokitën në derë, fillimisht te Belinda dhe, me shumë gjasa, shumë shpejt edhe te ti, the: Prit! Si e bëra unë gabimin t’i trajtoj ata me pagë më të lartë se timen?’ ‘Po nuk të pëlqyen, nuk i zbaton’, ka qenë kjo një tjetër akuzë e Bardhit drejtuar kryeministrit, ku sipas tij Rama ka projektuar një shtet privat, ku vendimet e Gjykatës Kushtetuese mund ti trajtojë në bazë të humorit të tij. Në përgjigje ndaj Bardhit, kryeministri u shpreh me ironi se nuk pyet mendjet ‘e ndritura’ të opozitës.