Policia e Tropojës, në bashkëpunim me strukturat operacionale të policisë së Kukësit ka finalizuar operacionin policor të koduar “Velishti”, duke arrestuar dy persona që qarkullonin të armatosur dhe të pajisur me mjete të ngjashme me ato të policisë. Në pranga kanë rënë Arjan Prengzaj dhe dhe Avdi Ismajlgeci, të cilët u kapën në fshatin Velisht, duke lëvizur me një automjet tip Mitsubishi. Gjatë kontrollit, policia u zbuloi dhe sekuestroi 2 armë zjarri, municion luftarak, silenciator, karikatorë, thika, sëpata, dylbi nate, gjashtë radio komunikimi identike dhe uniforma të ngjashme me ato policore, si dhe radio shtesë. Policia bën me dije se arsenal i sekuestruar do të dërgohet në Institutin e Policisë Shkencore për të verifikuar përdorimin e mundshëm në ngjarje kriminale. Sakaq vijojnë hetimet për të bërë të mundur zbardhjen e plotë të aktivitetit të dy të arrestuarve.