Administrata tatimore ka nxjerrë udhëzimet për profesionistët e lirë, të cilët përfitojnë rimbursime pas shfuqizimit të tatimit nga gjykata kushtetuese. Deri më 30 dhjetor do të kthehen të gjitha këstet e parapaguara të tatimit mbi fitimin. Bëhet me dije se rimbursimi i shumave të paguara për tatimpaguesit që ofrojnë shërbime profesionale, me të ardhura bruto deri në 14 milionë lekë do të kryhet në llogaritë e tyre bankare. Administrata tatimore njofton se është shumë e rëndësishme që tatimpaguesit, subjekt i këtij akti ligjor të kenë llogari bankare aktive në një nga bankat e nivelit të dytë, në monedhën vendase. Nevojitet që brenda datës 10 dhjetor 2024, tatimpaguesit që përfitojnë rimbursim të verifikojnë, saktësojnë apo përditësojnë të dhënat e llogarive të tyre bankare në llogarinë e deklarimit elektronik, e-filling, duke klikuar në menu kategorinë detajet e bankës. “Sjellim në vëmendje që informacioni i të dhënave bankare duhet të plotësohet në mënyrë të saktë dhe që llogaria duhet të jetë aktive dhe në monedhën Lek për të mundësuar rimbursimin e pagesave të kryera si dhe për të shmangur gabimet e mundshme në kryerjen e transaksioneve.” – thuhet në njoftimin e administratës tatimore. Nga ky akti normativ i miratuar nga qeveria për kthimin e kësteve të parapaguara, përfitojnë 6450 profesionistë të lirë, që do rimbursohen me fond prej 501 milionë lekë.