Dy ditë para hyrjes në fuqi të detyrimit për instalimin e pajisjeve POS në transportin publik, shoqatat e sektorit janë shprehur se nuk janë ende gati dhe kërkojnë shtyrje të afatit. Operatorët e transportit urban dhe interurban shprehen se ka paqartësi të shumta, sidomos për kostot bankare dhe mungesën e infrastrukturës teknike për funksionimin e sistemit. Sipas shoqatave, problemi kryesor lidhet me komisionin bankar prej rreth 30 lekësh për çdo pagesë me kartë, ndërkohë që bileta e urbanit kushton 40 lekë. Po ashtu, operatorët theksojnë se autobusët aktualisht nuk kanë internet apo sisteme elektronike të fiskalizimit për përdorimin e POS-ve. Kreu i Shoqatës së Transportit Urban dhe Interurban, Dashnor Memaj, është shprehur për revistën Monitor, duke thënë se ka kërkuar që procesi të shtyhet deri në zgjidhjen e të gjitha pikëpyetjeve teknike dhe financiare.