Kryeministri Edi Rama kërkoi nga kryebashkiakët më shumë punë në drejtim të mbrojtjes së mjedisit dhe sidomos hedhjes së mbetjeve plastike në territor, që sipas tij, ishin një ndër faktorët e përmbytjeve të fundit në Durrës dhe Gjirokastër. Dhe pamë se si kjo situatë u ndërlikua, ndër të tjera, edhe nga papërgjegjshmëria rrëqethëse e shumëkujt ndër ne, që si qytetar i kësaj republike apo si vizitor shqipfolës kryesisht, sepse nuk janë turistët e huaj që hedhin mbetje plastike në konsumin e tyre të përditshëm nëpër rrugë, e konsideron këtë vend si një landfill kudo ku ndodhet dhe hedh shishen e zbrazur të ujit apo të pijeve joalkoolike ose qesen plastike. Dhe e gjithë kjo sasi e madhe që hidhet rrugëve, ku këtu hyjnë edhe mungesa e një menaxhimi, ashtu siç do të duhej të mbetjeve të konsumit familjar në territoret rurale, mblidhet dhe, falë erës si fillim dhe falë ujërave të ngritur nga këto situata reshjesh intensive, bie dhe bllokon pika kyçe të rrjetit të kullimit, siç ndodhi në Shkozet, siç ndodhi në Gjirokastër, siç ndodhi në disa pika të tjera, për të mos i numëruar të gjitha.