Autoriteti i Medias Audiovizive kërkon ashpërsin të sanksioneve ndaj piraterisë televizive. Deklarata u bë nga kryetarja e AMA-s, Armela Krasniqi gjatë tryezës së organizuar në Këshillin Kombëtar të Integrimit me tematikë "Lufta kundër piraterisë digjitale dhe audiovizive, progresi dhe sfidat në kuadër të negociatave për anëtarësim në Bashkimin Europian". Kreu i grupit parlamentar të Partisë Socialiste, Taulant Balla deklaroi se fenomeni luftohet me thellimin e bashkëpunimit mes institucioneve përgjegjëse për zbatimin e ligjit. “Pirateria sot nuk kufizohet vetëm te sinjali televiziv pa autorizim apo te një faqe interneti e paligjshme. Ajo operon përmes platformave streaming, IPTV-ve pirate, serverëve të vendosur jashtë juridiksionit tonë dhe aplikacioneve që shpërndajnë përmbajtje në kohë reale. Për këtë arsye, lufta kundër këtij fenomeni kërkon shumë më tepër sesa ndërhyrje ligjore; kërkon institucione të koordinuara, kapacitete teknike dhe bashkëpunim që shkon përtej kufijve” Sipas Ballës, pirateria nuk është më vetëm një problem i shkeljes së të drejtave të autorit, por një sfidë që prek sundimin e ligjit, ekonominë dhe detyrimet që Shqipëria duhet të përmbushë në procesin e integrimit europian.