Ndërtuesit që duan të ndryshojnë projektin e zhvillimit pasi janë pajisur me leje ndërtimi nga institucionet vendore apo qendrore shtetërore, apo që kërkojnë zgjatje të lejeve të ndërtimit do të tarifohen. Qeveria ka miratuar një vendim, sipas të cilit çdo ndryshim projekti pasi objekti është pajisur me leje do t’u kushtojë ndërtuesve një tarifë prej 300 mijë lekësh, ndërsa shtyrja e afateve të lejes së ndërtimit do të tarifohet me 3 milionë lekë. Tarifat janë konceptuar nga Qeveria jo më shumë si përpjekje për të siguruar të ardhura në buxhet se sa si kriter që ndërtuesit t’i përmbahen projektit fillestar me të cilin kanë fituar lejen dhe ta përfundojnë atë brenda afateve të lejes së dhënë. Ndërkohë, veç këtyre dy tarifave është shtuar edhe një tarifë që do të mblidhet nga Këshilli Kombëtar i Territorit me kosto 100 lekë për metër katrorë dhe një tarifë 1 për qind e vlerës së investimit, që paguhet pasi del leja e zhvillimit.