Bakhmuti ka hyrë tashmë në historinë Botërore, pasi atje po zhvillohet një nga betejat më të ashpra të luftës mes Rusisë dhe Ukrainës. Prej muajsh trupat ruse po provojnë të marrin kontrollin e qytetit, por rezistenca e ukrainasve është për t’u admiruar, si pjesë e taktikës për të lodhur armikun. Në këtë qytet është rikthyer edhe e ashtyquajtura Luftë e llogoreve, një kujtim i hidhur nga Lufta e Parë dhe e Dytë Botërore. Në një video të shpërndarë nga Brigada e Pestë Sulmuese e Ukrainës, shfaqet një tank ukrainas që afrohet dhe godet drejt llogoreve ku po nxitonin të futeshin ushtarët rusë. Pas dy goditjeve të para jo fort të kalibruara, tanku arrin ta kryejë me sukses misionin dhe tërhiqet, por vetëm pak sekonda më vonë, shfaqet një tjetër mjet i blinduar, që vijon goditjet ndaj llogoreve zigzage, ku strehoheshin trupat ruse. Bakhmuti ishte një qytet me 70 mijë banorë para luftës, ndërsa aktualisht banohet nga më pak se 3 mijë. Burime nga kampi ukrainas, thonë se që prej nisjes së betejës, vetëm në Bakhmut janë vrarë rreth 45 mijë luftëtarë nga të dy kampet. Pamjet: AFP