Ish-presidenti i Rusisë, Dmitry Medvedev, ditët e fundit ka qenë më aktiv në rrjetet sociale me kërcënime, veçanërisht pas ofensivës së Ukrainës në rajonin rus të Kurskut. Kërcënimi më i fundit i lëshuar prej tij i drejtohet Gjermanisë. Medvedev ka reaguar pas një shkrimi të gazetës gjermane Bild, ku theksohej se tanket gjermane janë kthyer në Rusi, duke aluduar për donacionet gjermane të tankeve për ushtrinë ukrainase që tani po përdoren në ofensivën në territorin rus. “Gazeta gjermane Bild botoi një artikull revanshist në të cilin me krenari shpalli kthimin e tankeve gjermane në tokën ruse. Si përgjigje, ne do të bëjmë gjithçka për të dërguar tanket e fundit ruse në mes të Berlinit”, tha Medvedev. Ai komentoi më herët ofensivën e Ukrainës dhe tha se Rusia nuk duhet të flasë më për kufizime kur bëhet fjalë për territorin ukrainas. “Që nga ky moment operacioni ushtarak special nuk duhet të ketë më kufizime. Tani mund dhe duhet të flitet hapur”, u shpreh Medvedev duke aluduar ndoshta dërgimin e trupave ruse deri në kiev, një tentativë që dështoi në fakt në fillimin e luftës.