Sekretari i Përgjithshëm i Bashkimit Evropian për Veprim të Jashtëm, Stefano Sannino, tha të premten se Rusia e ka çuar luftën e saj në Ukrainë “në një nivel tjetër”, duke kryer sulme ndaj civilëve dhe shënjestrave joushtarake. Ai po ashtu kritikoi Moskën për nxitje të vendimeve që kanë marrë Shtetet e Bashkuara dhe Gjermania, për të dërguar tanke të avancuara në Ukrainë. Duke folur në një konferencë në Tokio, Sannino tha se Putin “ka devijuar nga koncepti i operacionit special në konceptin e luftës kundër NATO-s dhe Perëndimit”. Ai tha se tanket gjermane dhe amerikane pritet të ndihmojnë ukrainasit që të mbrojnë veten në luftë dhe nuk do t’i kthejnë ata në sulmues. “Mendoj se zhvillimet e fundit, sa u përket furnizimeve me armë, janë përgjigje ndaj situatës dhe mënyrës se si Rusia e ka çuar luftën në nivel tjetër”, tha Sannino. Shtetet e Bashkuara dhe Gjermania bënë të ditur të mërkurën se do të dërgojë tanke të avancuara në Ukrainë për ta ndihmuar Kievin që të luftojë forcat ruse. Komandantët e ushtrisë ukrainase kanë thënë se këto armë do të ndihmojnë në kundërofensiva, dhe do të zvogëlojnë numrin e ushtarëve ukrainas të vrarë në luftë. Presidenti amerikan, Joe Biden ka bërë të ditur tashmë se në ukrainë do të dërgohen 31 tanke M1 Abrams, pavarësisht qëndrimeve fillestare të Uashingtonit se ato janë shumë sfiduese që të përdoren nga ushtarët ukrainas. Ndërkohë që më herët gjermania pranoi të dërgonte 14 tanke leopard nga inventari i saj, në Kiev. Rusia e ka kritikuar vendimin e shteteve perëndimore dhe është zotuar se do t’i shkatërrojë këto tanke në fushëbetejë.