Një nga emrat më të njohur të botës së krimit në Berat, Irfan Azizi, i njohur si “Fania”, po kundërshton ekstradimin nga Britania e Madhe drejt Shqipërisë. Para gjykatës në Londër, ai deklaroi se nëse kthehet në vendlindje, jeta e tij rrezikohet nga një atentat i mundshëm i organizuar nga Talo Çela. Azizi dëshmoi se në vitin 2020 i shpëtoi për pak një sulmi me armë automatike, ku u qëllua rreth 30 herë, duke shtuar se autorët nuk paralajmërojnë, por veprojnë. Sipas tij, grupi që qëndron pas atentatit ka kapacitete të forta kriminale dhe mund të godasë edhe figura të rëndësishme, gjë që e bën të pamundur kthimin e tij në Shqipëri. Ai pretendoi gjithashtu se ka paguar për të mbyllur çështje gjyqësore në vend, ndërsa theksoi rrezikun që i kanoset edhe familjes së tij.