Gjykata e Posaçme kundër korrupsionit dhe krimit të organizuar dënoi me 18 vite burg Talo Çelën, lidhur me megagrabitjen e 5.4 milione eurove në aeroportin Nënë Tereza në Rinas, ngjërje e shënuar në muajin prill të vitit 2019. Vendimi u dha nga trupa gjykuese e përbërë nga Erjon Bani, Rudina Palloj dhe Elsa Ulliri. Prokuroria e Posaçme kërkoi dënimin e Talo Çelës me 19 vite për kryerjen e një sërë veprash penale. Ky i fundit është një nga personat më të shumëkërkuar në Shqipëri. Ai u shpall në kërkim në kuadër të operacionit të koduar “Plumbi i Artë”, që coi në kapjen e Nuredin Dumanit, Henrik Hoxhajt si dhe të disa personave të tjerë, pjesë e botës së krimit. Për ngjarjen e 2019, GJKKO në tetor të vitit të kaluar dënoi me 122 vite burg 7 të pandehurit e grupit kriminal. Klement Çala u dënua me 20 vite, ndërsa gjashtë të tjerët Oltion Veseli, Renaldo Sulaj, Saimir Cela, Oltion Pikli, Alkon Bengasi dhe Eldi Çala me 17 vite burg. Të dënuarit po e vuajnë dënimin në një burg të sigurisë së lartë.